Frettir

Thursday, 22 November 2018

Fyrstu vörurnar komnar í vefsöluna

Author Haraldur Eiríksson

Fyrstu vörurnar komnar í vefsöluna

Nú eru fyrstu leyfin komin inn í vefsöluna okkar. Um er að ræða sjóbirtingsdaga í Grímsá í Borgarfirði og nokkur valin holl í Brynjudalsá í Hvalfirði.

 

Það eru aðeins rúmir fjórir mánuðir uns sjóbirtingsveiðin hefst, og hefur Grímsá átt vaxandi vinsælda að fagna á vordögum. Verði veiðileyfa er stillt í hóf og stangirnar tvær seldar saman frá morgni til kvölds.

Brynjudalsá hefur átt dyggan aðdáendahóp, þá sér í lagi eftir að tekin var sú ákvörðun að leyfa aðeins fluguveiði í þessari nettu og viðkvæmu á. Glæsilegt veiðihús gerir ána að vænlegum áfangastað fyrir fjölskyldur og vini.

Saturday, 27 October 2018

Hafralónsá 2019

Author Haraldur Eiríksson

Hafralónsá 2019

Lokatölur úr Hafralóná í sumar liggja ekki endanlega fyrir, en voru á bilinu 220-230 laxar. Aðeins er veitt á fjórar stangir á firnalöngu veiðisvæði, en Þistilfjörður og nágrenni var frekar rólegt í sumar, eins og sést á veiðitölum víða á svæðinu. Bleikja var mikilvægur meðafli því hún var stór þetta árið, og dæmi um hörku uppgrip þegar menn lögðu leið sína til að egna fyrir silung. Þess má geta að silungasvæði árinnar var í sumar sameinað laxasvæðinu sem lengir veiðisvæðið enn frekar. Bókanir fyrir sumarið 2019 ganga vel, og eftirfarandi dagsetningar eru á lausu:

30 júlí -2 ágúst

8-11 ágúst

17-20 ágúst

1-4 sept

7-10 sept

Nánari upplýsingar má fá á netfanginu This email address is being protected from spambots. You need JavaScript enabled to view it.

Friday, 19 October 2018

Lokatölur úr Laxa í Kjós

Author Haraldur Eiríksson

Lokatölur úr Laxa í Kjós

Lokatölur úr Laxá í Kjós og Bugðu urðu 1.054 laxar sem er rétt undir meðaltali árinnar. Segja má að Laxá hafi átt mun meira inni, en slakur ágústmánuður kom í veg fyrir að niðurstaðan yrði betri, því talsvert var af laxi í báðum ánum.

Veiðin fór vel af stað, og var júlímánuður einn sá besti í fjöldamörg ár. Mikið og gott vatn tryggðu það að veiðin hélst jöfn og góð, og sem dæmi þá gáfu allar júlívikurnar yfir 100 laxa veiði, sem er mjög gott á 6-8 dagsstangir. Hins vegar varð tökutregðan mikil þegar að vatn minnkaði í ágústmánuði og tók ekki almenninlega við sér fyrr en fyrstu haustlægðirnar settu svip sinn á septemberveiðina. En þá varð líka aftur gaman, og sem dæmi gaf síðasta vika tímabilsins vel yfir 100 laxa.

Minna var af sjóbirtingi en oft áður, en þess í stað var meðalþunginn betri. Dæmi voru um fiska að 15 pundum, og 8-12 punda fiskar nokkuð algengir.

Rétt er að geta þess að stórlöxum fer fjölgandi í Kjósinni, og voru a.m.k þrír laxar yfir 20 punda markinu að þessu sinni. Það gefur veiðinni enn skemmtilegri blæ.

Það er mikil eftirspurn eftir leyfum fyrir sumarið 2019 og hvetjum við áhugasama að hafa samband á netfangið This email address is being protected from spambots. You need JavaScript enabled to view it.

Monday, 08 October 2018

Lokatölur úr Laxá í Dölum

Author Haraldur Eiríksson

Lokatölur úr Laxá í Dölum

Lokatölur úr Laxá í Dölum liggja fyrir. Í sumar veiddust 1207 laxar sem er frábær veiði á aðeins 4-6 stangir og setur Laxá enn og aftur á stall með allra bestu laxveiðiám landsins. Áin er að öllu leyti sjálfbær, en leigutakar í samstarfi við landeigendur hafa stundað hrognagröft uppi á heiðum til að nýta búsvæði sem best. Veiðin frá opnun og fram í aðra viku ágústmánaðar var framúrskarandi, og dæmi um að fjögurra stanga hollin væru að fá á annað hundrað laxa. Ljóst er hins vegar að göngurnar komu mjög snemma á Laxármælikvarða, og er kom fram í ágústmánuð, sem venjulega er góður tími í Laxá, voru þær yfirstaðnar. Því dróg mjög úr veiði uns rigna tók seint um haustið. Mikil ásókn er í leyfin sumarið 2019.

Monday, 08 October 2018

Bókanir hafnar fyrir 2019

Author Haraldur Eiríksson

Bókanir hafnar fyrir 2019

Nokkuð er síðan að bókanir hófust fyrir sumarið 2019. Mikil ásókn er fyrir næsta sumar, og ákveðin tímabil nú þegar seld. Athygli er vakin á því að Krossá á Skarðsströnd verður ekki í boði hjá okkur á næsta ári, og lýkur þar samvinnu við landeigendur sem staðið hefur um árabil. Þeir sem hafa áhuga á að festa sér daga á vatnasvæðum Hreggnasa næsta sumar ættu að hafa hraðar hendur. Hægt er að leita nánari upplýsinga á This email address is being protected from spambots. You need JavaScript enabled to view it. og This email address is being protected from spambots. You need JavaScript enabled to view it. .

Monday, 08 October 2018

Veiði lokið

Author Haraldur Eiríksson

Veiði lokið

Veiði er nú lokið á öllum veiðisvæðum Hreggnasa. Sumarið var í meðallagi hvað veiði áhrærir, en ljóst er að göngur komu snemma og fyrri hluti tímabilsins var mjög góður. Ágústveiðin var hins vegar frekar róleg, en tók síðan aftur kipp um haustið. Sem dæmi um það þá skilaði síðasta vikan í Laxá í Dölum nálega 140 löxum og Laxá í Kjós fór yfir 100 laxa veiði síðustu vikuna.

Lokatölur munu birtast hér á síðunni þegar að þær liggja fyrir.

Monday, 03 September 2018

Frábært vatn í Kjósinni og veiðin farin að taka kipp

Author Haraldur Eiríksson

Frábært vatn í Kjósinni og veiðin farin að taka kipp

Eftir frekan þurran og erfiðan ágústmánuð fór að rigna í Kjósinni eins og víða á Vesturlandi. Sem stendur er áin í frábæru vatni og veiðin með ágætum eða um 800 laxar nú þegar að þrjár vikur eru eftir tímabils. Stærstu laxarnir sem stendur eru tveir rúmlega 100cm hængar, en vonandi bætast nokkrir við, því óvenju mikið er af stórlaxi í Laxá þetta árið. Við minnum á að hægt er að fá staka daga í september á vefsölunni okkar.

Monday, 03 September 2018

Dalirnir komnir yfir 900 veidda laxa

Author Haraldur Eiríksson

Dalirnir komnir yfir 900 veidda laxa

Það rigndi í Dölunum í síðustu viku og venju samkvæmt tóku veiðitölur kipp. Haustið getur verið óhemju drjúgt í Laxá og engin ástæða til að ætla annað þetta árið enda nokkuð drjúgt af laxi á ferðinni. Sem stendur eru komnir á land um 930 laxar, og stefnir í að áin fari jafnvel yfir meðaltal sl. 30 ára sem eru um 1.100 laxar. Nokkrir stórlaxar hafa veiðst undanfarið, en úr ánni eru komnir 104 og 102 cm hængar.

Monday, 23 July 2018

Kjósin minnir á sig

Author Haraldur Eiríksson

Kjósin minnir á sig

Laxá í Kjós er að sýna sitt besta andlit þessa dagana. Vikan 4-11 júlí gaf 165 laxa og vikan 11-18 júlí bætt við öðrum 130 löxum auk fjölda stórra sjóbirtinga. Það er búið að vera gott vatn frá opnun og ekkert útlit fyrir að það breytist miðað við veðurspána. Þess má geta að við eigum fjórar stangir lausar frá hádegi 6. ágúst. Nánari upplýsingar veitir Haraldur Eiriksson á This email address is being protected from spambots. You need JavaScript enabled to view it.

Monday, 23 July 2018

Rosaleg veiði í Laxá í Dölum

Author Haraldur Eiríksson

Rosaleg veiði í Laxá í Dölum

Það er feiknaveiði í Laxá í Dölum þessa dagana. Eftir einn og hálfan dag er hollið sem hóf veiðar á hádegi þann 21. júlí komið með 71 lax á fjórar stangir. Fyrsti eftirmiðdagurinn gaf einn og sér 33 laxa. Mjög góðar göngur eru í ána og útlitið gott. Áin er með öllu uppseld.

Friday, 22 June 2018

Góðar opnanir í Kjós og Grímsá

Author Haraldur Eiríksson

Góðar opnanir í Kjós og Grímsá

Opnunardagarnir í Laxá í Kjós og Grímsá voru góðir. Í Kjósinni varð niðurstaðan 36 laxar á opnunarhollið, sem er mjög gott í ljósi þess að við erum að opna fyrr en venjulega. Athyglivert er að smálax er byrjaður að ganga í bland við stórlaxa, sem þetta árið eru að stórum hluta vænir hængar, 12-16 punda boltar.

Mikið vatn er í ánni og ekkert útlit er fyrir að það breytist.

Í Grímsá fengum við einnig fljúgandi start. 20 laxar fyrsta daginn og þar var sama sagan, smálax í bland við væna fiska. Mest var veiðin á neðstu svæðunum en þó komu laxar úr Efstahyl, þannig að öll svæði eru komin inn. 

Það eru spennandi dagar framundan!

Friday, 25 May 2018

Fer að styttast að laxveiðitímanum

Author Haraldur Eiríksson

Fer að styttast að laxveiðitímanum

Nú fer óðum að styttast í að fyrstu laxveiðiárnar opni. Hjá Hreggnasa mun Laxá í Kjós ríða á vaðið en að þessu sinni hefst veiði þann 15 júní. Aðeins er veitt á fjórar stangir í upphafi veiðitíma.

Veiði í Grímsá í Borgarfirði hefst að morgni 19 júní og Laxá í Dölum að morgni 26. júní eða um svipað leiti og Hafralónsá í Þistilfirði og Hofsá í Vopnafirði.  Svalbarðsá í Þistilfirði opnar venju samkvæmt þann 1. júlí.

Smærri árnar, Krossá á Skarðsströnd og Brynjudalsá í Hvalfirði opna báðar þann 27. júní.

Veiðileyfasala hefur gengið ágætlega. Þær síðastnefndu eru nánast uppseldar auk Laxár í Dölum og Svalbarðsár. Enn má hins vegar fá leyfi í Hafralónsá og síðla sumars í Kjós og Grímsá. Nánari upplýsingar má fá á netfanginu This email address is being protected from spambots. You need JavaScript enabled to view it.

[12 3  >>